اشلون بيه لو تغمض اعيوني وعن خدمتك بالگبر سألوني

اشلون بيه لو تغمض اعيوني
وعن خدمتك بالگبر سألوني
ــــــــــــــــــــــــــــــــــــــ
اشلون لو دفتر اعمالي ينفتح
ومالگو بي خيمه محروگه ورمح
فاهيه اعمـــالي ولا بيهن ملح
شرد اگولن بالله لو لاموني
ــــــــــــــــــــــــــــــــــــــ
اشلون لو بجفوني ماشافو سهر
ولا مشيت بيوم عشــرين ابصفر
وللّطم ماشافو ابصدري أثر
اشلون لـو بسياطهم ضربوني
ــــــــــــــــــــــــــــــــــــــ
اشلون لو خنگتني ذرات التراب
والـملك يسألني وانه بلا جواب
وين يا مسكين گضيت الشبـاب
ويصبح امن الخوف اصفر لوني
ــــــــــــــــــــــــــــــــــــــ
الناس كل ليلة الجمعه تختبص
عالزياره وانته ماعنـدك حرص
اشلون لو گـالولي بأيمانك نقص
وبالسلاسل گامو ايجــروني
ــــــــــــــــــــــــــــــــــــــ
اشلون لو تچـويني نـار الحاطمه
وآنه گلبي ممتلي ابحب فاطمه
ادركني اصيح الغوث ياحامي الحمه
ابجاه غربة زينب اتلگوني
ــــــــــــــــــــــــــــــــــــــ
ياحسين ارزقـني مهّدلي الدرب
وشيل گلبي وحطلي من طفك گلب
وخلي دمع العين مايگطع يصب
وبسجل هاي الخدم سجلوني
ــــــــــــــــــــــــــــــــــــــ
ارد الحگ عالبقن من العمر
حتى ما أتندم ابيوم الحشر
والبضاعه وياي تدخل للگبر
وبالمجالس واللطم طهروني
ــــــــــــــــــــــــــــــــــــــ
احسين ودّيني العزائك خل انوح
ووين مااشتـم هوى المجلس اروح
حتى لو تجعلني بيرغ عالسطوح
وبثيابي السـود خيدفنوني

محمد الجماسي

#اللهمعجللوليك_الفرج