ما تلمنا أرض و سمه يلمنا مأتم فاطمه

‘ ما تلمنا أرض و سمه
يلمنا مأتم فاطمه
***
فاطمه الچلمه الوحيده التعني للشيعه وطن
فاطمه الخيمه الچبيره البيها ما نخشى زمن
لهذا نحچيها بصراحه و ما نخاف امن العلن
ما تلمنا الدنيا كلها يلمنا گلب أم الحسن

غصباً اعله الظالمه
يلمنا مأتم فاطمه
***
‘ ما تلمنا أرض و سمه
يلمنا مأتم فاطمه

ما نعوف الزهره كلنا و لو يصير اصعب وضع
يلمنا مأتمها بحزنا يلمنا بمصابه الدمع
اشلون ننساها المصيبه و ننسى باب المندفع
و فاطمه جبرت كسرنا و هيّه مكسورة ضلع

و بضلعها و الدمه
يلمنا مأتم فاطمه
***
‘ ما تلمنا أرض و سمه
يلمنا مأتم فاطمه

تبقى حسرتها بگلبنا يبقى بينا هالجرح
من نسولف عن ألمها بينا لوعه تتضح
اشلون ما نبچي عليها اشلون بالمدمع نشح
و بظلام الدنيا شفنا مأتم الزهره صبح

بالليالي المظلمه
يلمنا مأتم فاطمه
***
‘ ما تلمنا أرض و سمه
يلمنا مأتم فاطمه

صبرت برغم المصيبه و ما ضعف بيها الصبر
هزمت اعداء الولايه بدمعه وحده تنهمر
علمتنا من ضلعها اشلون ما نخشى الكسر
علمتنا نصير ( منحر ) ما نخاف امن الشمر

ما نخاف الموزمه
يلمنا مأتم فاطمه
***
‘ ما تلمنا أرض و سمه
يلمنا مأتم فاطمه

ابهاليالي الفاطميه بينا جمره تلتهب
للقيامه انوح و نلطم للزچيه نتحب
ما نسيناها المصيبه ما يجف دمع اليصب
لو نسى لحظه گلبنا نشلع بچفنا الگلب

كل بدايه و خاتمه
يلمنا مأتم فاطمه
****
‘ ما تلمنا أرض و سمه
يلمنا مأتم فاطمه